東方日報專訊】無綫娛樂新聞台女主播林伊麗(Michelle)近日與金融才俊男友Henry在峇里舉行婚禮,宣讀誓詞一刻,男方搶先喊到收唔到聲,晚宴時Henry更準備了浪漫煙花,令Michelle超驚喜,兩人在煙火下浪漫親吻!

 

曾參選2013年港姐的林伊麗有「翻版張鈞甯」之稱,形象乖巧斯文,這位索女最近封盤,與拍拖年半的金融才俊男友Henry Chow在印尼峇里島舉行婚禮,兩人穿上婚紗及禮服在親友見證下成婚,Henry更在晚宴安排煙花,一對新人在璀璨煙花下錫錫,浪漫爆燈!

 

老公喊唔停

 

Michelle受訪時表示婚禮花了大半年籌備,感激雙方家人支持他們舉行海外婚禮:「請咗大約24位親友,由香港、美國、新加坡同上海飛過嚟觀禮,七月我會喺香港補擺喜酒。(最難忘邊部分?)宣讀誓詞,我覺得講結婚宣言應該係女仔喊,但佢講咗第一個我字之後就開始喊,喊到講唔出嘢,喊咗成兩、三分鐘,最後只係講咗I Love You,我已經覺得成個過程好感動!佢仲搞到來賓同家人一齊喊,但因為佢喊,到我講誓言嗰陣反而好有條理咁講晒出嚟,搞到好似佢似女人,我似男人咁!」

 

婚後繼續工作

 

她又表示Henry去年在法國旅行期間求婚,但當時未有掏出戒指,她也順攤地應承:「舊年5月20日,當時我哋喺法國,有晚喺海邊望海,佢突然間同我講:『不如嫁畀我吖』,佢係完全冇跪,亦冇攞戒指,但唔知點解我應承咗,之後佢攞隻戒指出嚟話有準備嘅,但話太緊張!所以我成日都同身邊朋友講,老公求婚嗰陣係冇攞戒指嘅!」問婚後會否做全職太太及生育計劃?她表示會繼續工作,想先享受二人世界,生BB就順其自然。